Yoko Tsang
  • 香港資深美容、時裝版編輯,精研最新醫學美容科技,通曉微整形奥妙與肌齡逆轉知識,沉迷鑽研喪食唔肥瘦身妙法,現為美容專欄寫作人、博客及節目主持人,著作《美肌瘦身秘笈》1及2、《醫學美容儀器天書》、《尋美 變靚述》。
    任何美容、扮靚、瘦身、飲食、時裝問題,請盡量在這網誌留言,因郵箱收件太多,或會錯過你的問題。【電郵:yokotsang@gmail.com】
    (Facebook:香港美容專欄作家 Yoko Tsang)、(微博:http://t.sina.com.cn/yokot)
字型:A | A | A

平靚正 萬能白藥膏

幾蚊可以買到乜東東好嘢,仲可以用足一年?
就係一直都想推介俾大家的萬用藥膏…
妙不可然之功效:
此平靚正藥膏可以舒緩皮膚上的疑難雜症…濕疹、濕毒、燙火灼傷、蚊叮蟲咬、爛腳趾罅、油螆角虱、無名腫毒;我就靠佢解決突發性的皮膚敏感,撫平粒粒和泛紅;我家姐靠佢治理間歇性暗瘡;媽咪就會塗在耳環針位上防止耳珠敏感和發炎,總之功效甚至勁過家傳戶曉的萬秀雷敦薄荷膏、萬金油、白花油、雪花膏同燙火露是我全家的必備良藥。
排場咁勁,佢係何方神聖?
名叫「九七四白藥膏」
由於歴史悠久,或者大家的媽咪甚至婆婆年代至會知佢係寶!
先睇下佢充滿 vintage 風味既紙盒包裝,咁六十年代的設計原來係 1998 年的新包裝。
打開紙盒係藍色圓餅形薄鐵盒,面積稍比 5元硬幣大少許,放入化妝袋一 D 都唔阻碇,方便隨身攜帶。
白色軟膏狀質地,較乾身。成份主要是 64%W/W  White Vaseline、香芧油、氧化鋅等。
盒側及說明單張印上創辦人何阜東樣貌,當然唔少得列明此白藥膏之萬能效用,仲威到話治理相關症狀無不應驗潻!
測試 1:
有人背脊生粒大瘡,實實的,掂吓都嗌痛。(圖示正中位置)
我用「九七四白藥膏」與患處作戰… 厚敷兩晚。
相信大家都唔覺眼粒瘡的所在位置,並非靠執相,而係搽「謝」咗!
測試 2:
Before: 於暗瘡或紅印位塗上,修護兼遮瑕呢!
After:塗上白藥膏後,紅色印痕明顯減淡,尤勝用遮瑕膏,唔怕塞毛孔!
當然,古銅肌色呢招就唔啱用喇!
網上吹水:
Forum 上有人謂:「呢隻嘢(九七四)殺暗瘡好掂,幾日即謝,超平 $6。」
另有人謂:「發現價值只港幣五元的「九七四白藥膏」功效神奇無比,小至暗瘡、大至爛肉,都搞得掂呀。」

當然,亦有人反問;「幾蚊盒藥膏搽上面怕唔怕呀?」
我會保守咁同大家講:「我覺得啱用所以推介俾大家,但並唔係 100% 保証人人都啱呢!藥用成份,敬請小心使用。」
巧遇知音人!
還有一段小插曲,話說尋晚我又去 CWB 加路連山道飯堂「泰滋美」,當最愛的嫩滑多汁鹽燒鰂魚同海南雞上桌時,身懷六甲的老闆娘赫然發現我放在桌面上的「九七四白藥膏」,即刻搭訕咁話:「咦!點解你都識用九七四?我婆婆在加拿大都成日叫我哋寄過去俾佢,係我媽咪教我用,應該無乜人會識嗰喎!真係好得,搽乜都可以。」
心諗… 當時老闆娘用咁猜疑嘅眼望住我,唔通佢有一刻懷疑我嘅年紀拍得住佢阿媽?

Oh… 其實都係我阿媽醒嘅心得啫!
-
香港顯微鏡牌「九七四白藥膏」
在大部份藥房都有售
(試過在北角買是 $9,沙田則只賣 $6)
Related Posts with Thumbnails

3 COMMENTS

  1. 你真是有很多秘密武器,,多谢你写出来与大家一起分享。

  2. Thanks for comment!
    Try my best ar!!

  3. hi~ Yoko

    haha.終於睇到你個blog喇,我當時係唔係懷疑我你嘅年紀拍得住佢我阿媽呀,我只係出奇,點解一個又靚又後生既女仔都會用呢樣婆仔野呢。。。。kakaka^_^