Yoko Tsang
  • 美容專欄寫作人、博客及節目主持人,著有《美肌瘦身秘笈》1及2、《醫學美容儀器天書》、《尋美 變靚述》1及2。
    任何美容、扮靚、瘦身、飲食、時裝問題,請盡量在這網誌留言,因郵箱收件太多,或會錯過你的問題。【電郵:yokotsang@gmail.com】
    (Facebook:香港美容專欄作家 Yoko Tsang)、(微博:http://t.sina.com.cn/yokot)
字型:A | A | A

塵世間最好味的拉麵–一蘭拉麵

假如你是拉麵痴,絕對明白,一碗拉麵,從湯底到麵質,以及配料、伴碟等等,都非常重要,單係日本雜誌《Tokyo Walker》每年都要搞拉麵全國大賽,就知道整個日本,對拉麵係幾咁重視!

而我今次來到日本(也不是今次,係每一次!),都要食番餐拉麵。老實講,今次到日本前,真係冇乜事前準備,連去大阪食乜拉麵、目標等都冇預備過。就在心齋橋閒逛時,赫然發現「一蘭」,OK,我剛食完晚飯,照食可也!

一蘭係我譽為塵世間最好食的拉麵,這個比喻唔係我個人所認為,而係一蘭獲《Tokyo Walker》評選為全日本拉麵冠軍,制霸全日本!我身邊好多未食過一蘭的朋友,聽我講完後,再去日本食過一次一蘭後,回港後都會立即同我講:「早D知就可以早D食到咁正的拉麵!」未食過的各位,立即睇下有幾好味啦!

首先,一蘭遍佈日本各地區,但共通點係設計非常獨特,個室式風格,一人一格,各有屏風相隔,就算你係二人、四人同行,全部都係隔開晒,我估係因為一蘭想你專心食麵,快D食完快D走,事關門口經常大排長龍!

冇呃你,全部排排分開坐!

湯底係最考功夫烹調的豬骨湯底,食麵前,要先填一張表格,指明你想要的特別要求,例如多油定走油、走蔥定用青蔥或白蔥、加唔加辣、落唔落蒜片、麵的煙韌度。通常我的係走油走辣小蒜落青蔥(加蔥要加錢,圖中呢碗唔係我的,我個碗一到就食,唔記得影,唯有影朋友那碗),咁做最能夠試到豬骨湯的功力同火喉,點好味法唔再多講啦!

記得記得,一定要飲晒D湯,通常我都飲得晒,事關真係好好飲,飲晒之後就可以見到碗底有字,感激你飲到一滴湯都冇!

其實香港咁多日本拉麵店登陸插旗,何解咁好食的一蘭,遲遲唔來港開店,好多食過的朋友都話,只要一蘭到港,只要做番日本七成功力,已經可以稱霸全香港兼會經常去食!我諗,一蘭唔來港的原因,可能係怕湯底秘底被抄襲,雖知道,日本一蘭拉麵的店非常神秘,廚房遮實晒,也鬼都睇唔到,條湯底秘方同可口可樂條formula一樣咁神秘!

我自己最常去涉谷分店,貪佢24小時營業,住涉谷車站對面的Excel Hotel,三更半夜想食消夜,去一蘭就最方便,深夜去食仲唔使排隊添!

食以外,當然係shopping,今次購物時間並非很充裕,所以戰利品不多,加上¥貴,又冇減價,好多五十五十的東西,衡量過後都係唔買算。

———————————————————–

本週《MORE》專欄精采內容:Best of the best BB Cream

我發現吸引到最多女士們爭相回應的問題之一是:「請問各SIS係用邊隻BB cream ?邊隻較好用呢?」想知我會點評選,敬請留意今期《MORE》雜誌內我的專欄。

微博:http://t.sina.com.cn/yokot/

http://vipblog.sundaymore.com/yokot/

http://yokotsang.blogspot.com/

Related Posts with Thumbnails

2 COMMENTS

  1. 我男友都好鍾意食拉麵..去親日本都一定食一餐拉麵..但都未試過’一蘭’添>~<
    一人一格..好得意^^但..好似好悶..
    果然係好食得喎..食完飯..仲可以食拉麵^^好羨慕你呀…仲咁瘦..

  2. 前年去東京都有食過一人一格拉麵,都係一蘭呀, 幾得意O家.