Yoko Tsang
  • 美容專欄寫作人、博客及節目主持人,著有《美肌瘦身秘笈》1及2、《醫學美容儀器天書》、《尋美 變靚述》1及2。
    任何美容、扮靚、瘦身、飲食、時裝問題,請盡量在這網誌留言,因郵箱收件太多,或會錯過你的問題。【電郵:yokotsang@gmail.com】
    (Facebook:香港美容專欄作家 Yoko Tsang)、(微博:http://t.sina.com.cn/yokot)
字型:A | A | A

穴位埋線 減肥魔法

昨天上載的文章,才提及一晚走 3 埸瘋狂覓食至愛店舖,今日轉頭又講大熱減肥法,兩者背道而
馳真搞鬼!
佛誕當天攻打四方城,鍾意玩但唔代表叻,台灣牌仲未識數番,enjoy 的是吹水過程,其中一位有「
法拉」稱號的朋友 M 當天到場即大講減肥經,聽到我鬼咁用神又好奇走晒「雞」,男性友人則聽到
目定口呆,有理由相信呢招係佢贏錢策略!!
朋友 M 謂:「我俾人拮咗 48 針,而家身體藏有 48 條線,周身唔聚財好似有嘢頂住很酸痛,整嗰時針孔位會標血,要用手揞實止血。」心諗咩事呀?玩神打咩?咁嚇人!減肥真係要咁激?M 續:「我朋友早過我試,一百六十磅的她一個月減廿磅,見到咁好成績當然要博吓啦!」

朋友 M 就好似刺蝟咁,身體被拮滿針!

事緣某天后級歌星夫婦重金禮聘一位國內中醫師達人到港,包食包住,為的是其高超針灸埋線技術,
當天就只有他們、親戚及好友可以一試,而我的朋友 M 亦有幸成為其中一位。
呢幾日經過查明暗訪,為的是清楚描述俾有興趣大幅度減肥或想局部瘦身的你知來龍去脈:
何謂「穴位埋線」?
針灸是大家所熟悉的一種中醫療法,用於減肥也不是新鮮事,我幾年前都柴娃娃試過做小腿,但不能
持之以恆,因為一星期要去兩至三次,每次等睇症大半個鐘,加埋留針又要近半個鐘,太費時了。今
次講解的「穴位埋線」是針灸治療的改良與延伸,針灸一般針 20 分鐘左右,穴位埋線則是將經浸製
有效成分的羊腸線埋入穴位,即人體可軟化、分解、吸收之手術用縫線,持續 24 小時的刺激穴道、發揮效應,直到埋入的羊腸線被身體吸收為止,過程約兩週的時間,仿如無時無刻在針灸呢!
「穴位埋線」點解可以減肥?
中醫師會根據瘦身穴位落線,打通人體減肥要穴,原理是有效調節脂質的代謝過程、改善氣血循環、
利水消腫;其二是可以抑制食慾,通過對神經系統的調節,抑制胃酸分泌,胃不空,自然就有飽肚的
感覺,可以不太想吃東西了;其三是有效調節內分泌紊亂,証據顯示肥胖癥患者的內分泌紊亂發生率
極高,針灸通過調節「下丘腦垂體腎上腺皮質」和「交感腎上腺皮質」兩個系統,可以使內分泌紊亂
得以糾正,並加速脂肪的新陳代謝,因此達到減肥目的。當然醫師也會建議飲食及運動方面以配合。
可以局部瘦身嗎?
穴位埋線越來越精進,所以可以針對不滿意的局部作調整。我的朋友因為想快速減去全身肥肉達 30
磅,所以至咁激一次過埋 48 條線。以想減大腿為例,只需每邊落 4 針,即共埋 8 條羊腸線便可,主力集中促進下半身的血液循環,以達至雕塑曲線。
過程是如何?
1. 醫師戴上無菌手套與口罩。
2. 剪一段約 1-2 公分長之羊腸線,是用溫經散寒、舒經活血、芳香開竅的藥物泡製,如桂枝、丹參、麝香等等。
3. 將羊腸線放入前端針頭內。
4. 消毒要穴位埋線之皮膚。
5. 刺穿皮膚,將羊腸線埋入皮下的穴位中。
6. 快速抽出針頭,以埋線入體內。
「穴位埋線」應相隔幾耐做一次?
朋友 M 的中醫師謂每次療程最好相隔一個月,以她為例子,則 3 次便大功告成。
會有副作用嗎?
為了預防發炎或感染,穴位埋線後 4 個小時內埋線部位不要碰到水:此外,在兩天後,每天按壓埋線穴位,可增加效果。坊間每樣減肥法也存在一定危險性,以「穴位埋線療法」而言,當然也有一定風險,如發炎,建議找具認可執照及信譽的註冊中醫師獲較高保障至好試呀!而有特殊體質患者需注意,如糖尿病的患者,在血糖沒有控制下來時,最好不要嘗試穴位埋線,因為皮膚比正常人較易產生感染、發炎的機會;有過敏體質的患者,亦需先做評估才能接受埋線。
「穴位埋線」幾多錢呢?
朋友 M 的國內中醫師收費 $4,800(48針),即 $100(1針);網上有香港某中醫診所收 $1,000/20分鐘(不是逐針計)、亦曾有網民投訴某連鎖纖體公司的羊腸線療程索價4萬元;而我可以肯定的是台灣比香港更平,明碼實價,絕大部份普遍收費為台幣 800 元,一盤 8 支針,即港幣 $25(1針)。女士們數口咁精,計清條數不如走一轉台灣玩埋仲著數呀!
台灣 blogger 試後感
台灣有個出名乜都敢試嘅 blogger,剛於 2 月做咗大腿穴位埋線,她謂才埋了快一星期,已經偷偷瘦了兩公斤,最明顯是大腿間騰出更多空隙,水腫情況大大改善咗,超 happy!但當針拮在她大腿內側時,差點從床上跳下來想把醫生打暈,超痛的!真難以想像我朋友點樣捱得過 48 針呢!
名模莊思敏都試過
Jacquelin 謂早就親身試過穴位埋線療法:「雖然我身材屬於纖瘦類型,但仍受水腫問題困擾,上鏡會唔好睇。經友人介紹,姑且一試此療法,過程與一般的針灸無異。而試後兩星期,覺得最顯著既係減輕飢餓感,而去水腫情況亦不錯。」

我要去台灣!

其實呢種減肥法早幾年都經已存在,《FACE》亦有報導過,但唔知數解 hit 晤起又無乜人知,如今台灣突然大熱,加上朋友的推波助瀾,講到成效咁得連我都想試試。其實稍後安排好的台灣食買玩之旅早已事在必行,至於會否一試此穴位埋線減肥魔法則仍是心大心細…超痛喎好嚇人…但好快瘦呀…又激平喎…人云亦云都讃掂…可唔可以順便豐胸呢…我經已問到台灣有一間著名中醫診所,多星撑場又具規模,仲可以上網預約時間,都係等埋睇睇朋友 M 的減肥戰績,諗真 D 先啦!

Related Posts with Thumbnails

14 COMMENTS

  1. Hi yoko,
    你既sharing實在太正喇! 我都好想試下這種唔洗節食既減肥法! 如果你有新進展, 例如試左痛唔痛, 有冇效果等等, 可唔可以同我地分享下? 最好當然可以share埋你係邊到做啦! 唔該晒~

  2. 首先我會密切跟進我個 friend 試完有無瘦到,再覆妳吖;若果我嚟緊去台灣真係做埋線,亦唔介意 post 過程和感受,當然會寫埋地址啦!
    Thanks for ur comment!

  3. Hi Yokot,

    好多謝你既方享!我都好想試試 :)

    但想請問一下,你所提及的 $100 (一針) 是在香港哪裡呀?施幾針係咪由自己話事?如你朋友咁施 48 針咁多…….仲有除左會有感染、發炎既風險之外,仲會唔會有其他?

  4. 首先回覆$100一針非駐港中醫師,文中提及是國內中醫師受私人聘請專誠來港的。
    施針數量據朋友 M 所言,是由醫師決定,當然會先詢間治療者想減幾多、邊個部位及可接受程度等。
    除了有机會感染及發炎外,其他風險請向中醫師查詢,因為我也不可有確實答案呢!
    Thanks for ur comment!

  5. 請問有冇話埋完之后又咩唔食得?有咩要特別注意呢?埋后幾多天會開始瘦呢?

  6. 針灸埋線後要特別注意: 6 小時後才能洗澡,兩天內不宜泡浴和浸温泉,以免感染。
    至於食物方面,如朋友的中醫所言沒有特別限制,但最好減少進食海鮮、鴨、鵝等濕熱及帶剌激性易引起敏感的食物;想減肥效果更住,緊記睡眠前10小時內不能進食高熱量食物。
    埋線後纖瘦速度因人體質而異,–般人一星期內巳感受到水腫減輕;如以剛接受針灸埋線的朋友 M為例,她配合均衡飲食,未夠兩星期已有減 6磅成績。
    Thanks!!

  7. sound good, give more details .

    thanks

  8. I may be try that later, will post more details, thanks!!

  9. 我都想試試你那個中醫師呀, 請問你可否比中醫的聯絡資料我呢?

  10. Please check mail box,thanks!

  11. 我都好想試下, 可否給中醫的聯絡資料我嗎? 麻煩哂

  12. 文中提及的國內中醫師受私人聘請專誠來港的,所以也沒有資料可以提供到。當我知道她更進一步的資料,定會在 blog 上公開。
    thanks for comment.

  13. 我想問下你朋友的埋線醫師是不是有給減肥的藥物配住一起吃呢?我們這邊的同事也有去埋線,但是他們都需要吃一種藥物,如果不吃好像沒有減肥效果

  14. Hi Cooky,
    我個 friend 嘅醫師有開排毒丸,但沒有減肥藥呀!要控制飲食,一個月瘦咗13磅。